lean muid
Séásúr an Fhómhair 2020 / Autumn Season 2020
Séasúr an Fhómhair 2020 Ceannaigh Ticéid
 

Covid 19. An t-eolas is déanaí

Ar an 6 Deireadh Fómhair chuir Rialtas na hÉireann srianta leibhéal 3 i bhfeidhm sa stát go léir. Faoi leibhéal 3 níl imeachtaí amharclann-lonnaithe ceadaithe in aon chor. Ciallaíonn seo gur gá dúinn cuid de na scannáin a bhí beartaithe againn a chur ar ceal agus nach mbeidh Séasúr an Fhómhair ag tosú go dtí an 29 Deireadh Fómhair ar a luaithe. Beidh cinneadh faoi seo á thógáil agus á fhógairt anseo níos gaire don dáta sin.

Idir an dá linn beimid i dteagmháil le aon duine a cheannaigh ticéid le gur féidir linn aisíocaíocht a shocrú.

Tráthnóintí i dteannta Margueritte

(La Tête en Friche)

Stiúr: Jean Becker
An Fhrainc 2010
82 nóiméad
Teastas: 15A
Cé gur scannán gairid é an scannán seo is maith ann é! Scannán is ea é atá lán de mhothúcháin ach atá an-ghreannmhar mar sin féin. Ba dhóigh leat gur leathamadán é Germain (Depardieu) atá ag iarraidh a bhealach a dhéanamh sa saol.

Bíonn scéal chailleach an uafáis ag a mháthair (Maurier) i gcónaí, agus tá a saol caite aici ag rá leis nach bhfuil ann ach amadán. Cad leis a mbeifí ag súil mar sin ach go n-iompródh sé é féin mar a bheadh amadán ann? Ach tá an-chion ag na comharsana air. Caitheann sé lá i ndiaidh lae i gcaifé a charad Francine (Maurane), agus fios gnó gach aon duine aige. Tuigeann a leannán (Guillemin), ar tiománaí bus í, gur dea-dhuine é. Tuigeann Margueritte (Casadesus), bean atá 95 bliain d’aois, freisin é. Castar air í sa pháirc phoiblí agus léann sí leabhair leis agus cuidíonn sí leis tuiscint cheart a fháil air féin.

Is athrú iontach é an scannán seo ar scannánaíocht leamh Hollywood. Níl aon drogall ar an scannán seo aghaidh a thabhairt ar an saol mar atá sé i ndáiríre gan mór is fiú a dhéanamh de. Is léir go dtuigeann fear déanta an scannáin, Becker, go mbíonn an saol lán de ghreann ach go mbíonn sé crua uaireanta freisin. Agus gur in am na hanachaine go minic a thuigimid an saol i ndáiríre.