Marie Curie: The Courage of Knowledge

(Marie Curie)

Ba í Marie Curie, an fisiceoir agus an ceimiceoir, an chéad bhean a bronnadh an duais Nobel uirthi. Léiríonn an scannán seo faoi mar a throid sí chun aitheantas a fháil i réimse den saol a bhí faoi smacht iomlán na bhfear. Tosaíonn an scéal sa bhliain 1905 nuair a théann sí féin agus a fear, Pierre, go Stockholm chun léacht an Nobel a thabhairt agus léirítear mar a lean sí den obair nuair a cailleadh Pierre agus mar a ghnóthaigh sí an dara duais Nobel as a stuaim féin.

The Prince of Nothingwood

Is liosta le háireamh an méid scannán atá déanta ag an Afganastánach Salim Shaheen ach níl aithne mhór air lasmuigh den Mheánoirthear. É féin a chum an téarma Nothingwood, tá Hollywood ag na Meiriceánaigh, tá Bollywood ag muintir India ach níl tada san Afganastáin. Léargas geanúil, greannmhar atá sa gclár faisnéise seo ar an stiúrthóir croíúil, cáiliúil.

Heartstone

(Hjartasteinn)

Tá an scéal seo suite i mbaile beag iascaireachta san Íoslainn. Beirt déagóirí atá mar phríomhcharachtair an scannáin seo: caitheann duine acu an samhradh ag rith i ndiaidh chailín ach is mó suime atá ag an té eile ina chomrádaí. Ach tagann deireadh leis an samhradh agus le laethanta geala na hóige agus tugann siad beirt aghaidh ar an ród atá rompu. An buanchairdeas idir beirt bhuachaillí agus iad ag teacht in inmhe is téama don scannán Heartstone.

Human Flow

Gorta, athrú aeráide agus cúrsaí cogaíochta; is iad seo is cionsiocair leis an líon ard daoine a theith óna dtír féin agus atá anois easáitithe. 65 milliún ar fad atá ann, an líon is airde ó aimsir an dara Cogadh Domhanda. Sa scannán seo scrúdaíonn an t-ealaíontóir agus an gníomhaí Síneach, Ai Weiwei, géarchéim na dteifeach agus an tionchar pearsanta a imríonn sí ar an duine. In imeacht bliana leanann sé scéalta daoine a chuimsíonn 23 thír, an Afganastáin, an Fhrainc, an Ghréig, an Ghearmáin agus an Iaráic san áireamh.