The Olive Tree

(El olivo)

Scéal simplí faoin gcaoi a dtiteann clann amach le chéile atá sa scannán seo. Díolann feirmeoir seanchrann olóige a bhí ar thalamh a mhuintire le fada fíorach an lá agus, dar ndóigh, tarraingíonn sé seo achrann agus raic idir na gaolta ar fad. Tá a bhealach féin ag ‘chuile dhuine acu leis an tubaiste seo a chaoineadh. Tograíonn duine acu, cailín óg, dul á thóraíocht agus é a fháil ar ais ón gcomhlacht mór Gearmánach a cheannaigh é. Cé gur scéal simplí é seo, tá doimhneacht freisin ann sa gcaoi a léirítear nádúr an duine agus an tsochaí nua-aimseartha. Is scannán mealltach é seo a chuireann ina luí orainn gur tábhachtaí muintearas ná maoin agus is fiú go mór dul ag breathnú air.

Song of Granite

Léiriú ealaíonta ar shaol an tsárfhonnadóra, Joe Éinniú, atá sa scannán seo. Amhránaí eisceachtúil agus fear domhain a bhí ann a ndeachaigh amhráin agus an seanchas an cheantair sceirdiúil, álainn as ar fáisceadh é, go mór i gcion air.

The Odyssey

(L’Odyssée)

1948. Tá an saol ar a thoil ag Jacques Cousteau agus tá teach álainn aige féin agus a bhean agus a gclann mhac suite ar chósta na Meánmhara. Ach tá sé meallta ag an domhan fothoinn agus anois, a bhuíochas do threalamh nua-aoiseach scuba a ligeann dó análú faoin uisce, tá tine ar a chraiceann agus is fada leis go rachaidh sé ag fánaíocht faoin bhfarraige. Ach beidh air an téiléireacht a íoc. Faoi dheireadh thiar thall, tá scannán déanta de shaol eachtrúil an taiscéalaí farraige.

Graduation

(Bacalaureat)

Agus í ar tí scrúdú tábhachtach a sheasamh, déantar ionsaí fíochmhar ar mhac léinn cumasach, rud a fhágann go bhfuil baol ann nach bhfaighidh sí an deis scoláireacht a fháil chuig ollscoil aitheanta. Tograíonn a hathair, ar dochtúir é, a ladhar a chur sa scéal. Tugtar léargas sa scannán dúinn ar dhearcadh agus ar chinntí morálta an athar ach tá léargas chomh maith ann ar náisiún a bhfuil an chneámhaireacht agus an chaimiléireacht ina chroílár. Tá ainm na Rómáine in airde maidir le cúrsaí scannánaíochta le roinnt blianta anuas agus tá saothar máistriúil Cristian Mungiu ar cheann de na scannáin is mó atá molta ag na léirmheastóirí.