Féile Scannán na Réabhlóide 2016 - Clár agus Postaer
Féile Scannán na Réabhlóide 2016
Féile 2016 Postaer ardtaifigh4.6 MB
Tá Club Scannán Sailearna ag reachtáil féile scannán i gConamara i 2016 mar chomóradh céad bliain ar Éirí Amach na Cásca 1916. Beidh scannáin Éireannacha faoin Éirí Amach agus Cogadh na Saoirse chomh maith le scannáin aitheanta idirnáisiúnta ar théama na réabhlóide á dtaispeáint thar thrí lá (27-29 Bealtaine) in Amharclann na Seanscoile, Indreabhán, Co. na Gaillimhe. Beidh léachtaí agus seisiúin phlé le saineolaithe agus scannánóirí aitheanta ar an gcaoi a gcuirtear 1916 agus réabhlóidí i gcoitinne in iúl trí mheán na scannánaíochta. I measc na scannán a bheidh á dtaispeáint beidh Mise Éire (1959), Áille an Uafáis / A Terrible Beauty (2013), October - Ten Days That Shook the World (1928) agus The Battle of Algiers (1966). I measc na gcainteoirí atá deimhnithe beidh na saineolaithe staire agus scannáin Mary Harris, Des Geraghty agus Seán Crosson chomh maith le scannánóirí ar nós Bob Quinn.
Is club scannán pobail é Club Scannán Sailearna atá lonnaithe in Amharclann na Seanscoile, Indreabhán, Co. na Gaillimhe. Bunaíodh an club in 2007 agus ó shin i leith táthar ag taispeáint scoth na scannán sainealaíne idirnáisiúnta agus Gaelach thar dhá shéasúr in aghaidh na bliana don phobal. Cláraítear thart ar thrí scór ball leis an gclub gach séasúr agus bíonn taispeántais speisialta á n-eagrú ag an gclub go rialta a dhéanann céiliúradh ar scannánaíocht i mionteangacha agus faoi mhionchultúir. I measc na n-ócáidí speisialta seo reachtáladh súil siar ar shaothar Bob Quinn agus taispeántas dúbailte ‘Scannáin ón Imeall’ i gcomhar le Cinemobile.
Cathal Goan, iarcheannasaí RTÉ agus an chéad cheannaire ar TG4 a sheolfaidh an fhéile scannán seo atá mar chomóradh ar Éirí Amach na Cásca 1916.
Anseo thíos tá liosta na scannán a thaispeánfar:
| Amharclann na Seanscoile | An Cinemobile | An Poitín Stil | |
|---|---|---|---|
| Aoine 27 Bealtaine 2016 | |||
| 20.00 | Áille an Uafáis / A Terrible Beauty Éire (2013) 92 nóim |
Persepolis An Fhrainc (2007) 96 nóim |
The Square An Éigipt (2013) 95 nóim |
| Satharn 28 Bealtaine 2016 | |||
| 11.00 | Man of Iron An Pholainn (1981) 153 nóim |
The Revolution Will Not Be Televised (Chavez: Inside the Coup) Éire (2003) 75 nóim |
Rocky Road to Dublin (1968) 69 nóim |
| 15.00 | Mother Ireland Éire (1991) 54 nóim Cumann na mBan – Mná na Réabhlóide Éire (2015) 53 nóim |
An Tine Bheo Éire (1966) 45 nóim Concerning Violence An tSualainn (2014) 78 nóim |
Caoineadh Airt Uí Laoghaire Éire (1975) 52 nóim Splanc Deireadh na Gaeltachta Éire (2000) 53 nóim |
| 20.00 | Mise Éire Éire (1959) 85 nóim |
The Battle of Algiers An Iodáil / An Ailgéir (1966) 117 nóim |
FÉACH..1916..Gaillimh 12 nóim Bású : Liam Mellows 26 nóim Diarmuid Lynch 26 nóim |
| Domhnach 29 Bealtaine 2016 | |||
| 11.00 | Bernadette 'Súil Siar ar Aistear Polaitíochta' Éire (2011) 87 nóim |
October – Ten Days That Shook the World An Rúis (1928) 142 nóim |
Saoirse? Éire (1961) 90 nóim |
| 15.00 | Soy Cuba / I am Cuba Cúba (1964) 108 nóim |
Eoin Mac Néill: Fear Dearmadta 1916 / The Forgotten Man of 1916 Éire (2016) 50 mins |
Children of the Revolution Éire (2010) 92 nóim |
Beidh breis eolais faoina scannáin, maraon le blaiseadh beag dóibh le fáil ón suíomh idirlíon www.clubscannan.ie nó is féidir eolas a fháil faoin gClub Scannán ach glaoch ar Dan (087) 8168629 nó Donncha (086) 4048881.
